Dizionari de Lenghe Furlane

cjant  cjant  [FO]

1. s.m. il fâ musiche cu la vôs:  tal sanc i bulivin estris e spirts sabulîts, che si sbrocavin sul tart, tal vin e tal cjant (Maria Forte, Il bal spisimât des ombrenis); si scuen nomenâ ancje Elio Bartolini, scritôr e senegjatôr famôs in dut il mont, che cun Paolo Patui al à scrit Bigatis, preseade opare teatrâl che e lee la peraule cul cjant e la musiche (Luca Zoratti, Il teatri par furlan)
   
   1. singule composizion musicâl par vôs:  fasìn un cjant a la cjargnele / che a nus sintin di lontan / che a nus sintin de casere / là che al è il gno cristian; da dute chê int si alce gaudiôs e intonât prin il «Magnificat» po il «Pange lingua»: e il cjant al si spant pal aiar dulà che al si cjate intune sole glorie cul sun des cjampanis che a vongulis, a bugadis al ven jù dal seren dal cjampanili (Pieri Somede dai Marcs, Corpus Domini)
      Sin. cjançon , cjante , cjantose
   2. part vocâl di une cjançon:  tal spartît al è scrit parsore il cjant e sot lis notis
   3. tecniche di modulâ la vôs te musiche:  [a Montserrat e je] la scuele di cjant dai fruts, la plui viere di dute la Europe (Antoni Beline, Sant Jacum, là che al finìs il mont)
2. s.m. emission di suns dai uciei, biele di scoltâ:  chês gnots steladis lu incjantavin: l'odôr dal fen e dai peçs insiemi cul cjant dai franzei e dai montans che a nidiavin tal scûr misteriôs dal bosc e che a davin une vôs ae nature (Pieri Somede dai Marcs, Co une vôs e clame); une scjaipulute cuntun luiar vert e svearin che si disfave in cjant, e al pareve che al ves vût la Vierte dentri di se (Maria Forte, Cjase di Dalban); ogni tant une bugade di aiar e puartave il cjant di un gjal o il vuacâ di un cjan, mo ca, mo là, pierdûts tai cjasâi dilunc la Riviere, parentri il diluvi dai grîs e dai zupets (Alan Brusini, Par stradis lungjis)
   
   1. rumôr fat dal gri e di altris insets, no cu la bocje ma cun altris orghins:  un grant cidinôr fra i doi, rot nome dal cjant dai avostans e dal craçolâ dai crots (Roberto Ongaro, Il muc)
      Sin. griade ipon.
   2. rumôr fat ancje altris elements naturâi o di altris robis:  cumò chel cjant di aghe e di uciei e di fruts al zigave da fonts da la anime (Dino Virgili, La aghe da pît la cleve)
3. s.m. opare poetiche liriche:  sai, che vîl è il mio cjant, bas il mio stîl, / par dâti laude è indegn di tant onôr (Ermes di Colorêt, II, 128)
   Sin. liriche , poesie
   
   1. part di un poeme:  la struture dade di Dante e je stade rispietade ad in plen, i cjants furlans di chest Infier a mantegnin la cjadene di rimis des tercinis, cuntune alte variabilitât e cualitât (Sandri Carrozzo, Note dal curadôr ae traduzion dal Infier di Dante)
      Sin. libri
4. s.m. (fig.) sensazion interiôr:  il svindic al jere daûr a inventâ il so cjant di sanc dentri di me, un cjant salvadi e mat, che o provavi pe prime volte in chê forme barbare e primordiâl, che e faseve plui lizêr il gno dolôr, e mi permeteve di sopuartâlu (Carlo Sgorlon, Il dolfin)

Proverbis:

• ancje il mus si disgose par fâi un cjant a la morose
• dal cjant si cognòs il rusignûl