Dizionari de Lenghe Furlane

calmâ¹  cal|mâ  [AF]

1. v.tr. fâ deventâ calm, cuiet:  subit i doi zovins a calmarin la mame, le faserin sentâ doprant dute la gracie e lis tenarecis propriis dai fîs (Tarcisio Venuti, La cjase di Toni); in fonts dal curtîl, sot un morâr, un trop di feminis a cirivin di calmâ, dutis insiemi, Rose Sandron che si sgjavelave urlant (Pieri Menis, Sflameadis); al tignì a fuart lis brenis parcè che il cjaval al deventave gnervôs se il belancin i petave tai sghirets. «Sù bon, Saur» lu calmave (Maria Forte, La tiere di Lansing)
   Sin. bonâ , dumiesteâ , cuietâ , mugnestrâ
   
   1. fâ deventâ mancul fuart, plui facil di sopuartâ:  e parave jù pirulis par calmâ il mâl di cjâf (Carlo Sgorlon, Ombris tal infinît); Degasperi, fevelant ai rapresentants de stampe, ur racomandave di calmâ lis pôris dal public sigurantlu che nol è propit nissun parcè di pierdi il cjâf (Josef Marchet, Il pietin e il grop)