Dizionari de Lenghe Furlane

a vele    [CO]

1. loc.av., loc.adi.inv. di barcje o nâf, che e va cu lis velis in graciis de fuarce dal aiar:  te barcje a vele doi argjentins e spiavin la rive di Buenos Aires cuntun voli voltât di tant in tant ai blancs palaçons di Montevideo (Domeni Zannier, La crete che no vai); partît cuntune nâf a vele, al tornave cuntune nâf a vapôr (Gianni Colledani, Un furlan a Wuhan)
2. loc.av. viazant cuntune barcje o cuntune nâf sburtadis dal aiar:  ven pûr dilunc, / a pît ed a cjaval, / a vele, a rems, / a ce mût cu tu vûs (Zuan Batiste Donât, A chê grant bestie e male besteace, stirpe di cjans, di lôfs di peiôr raze)
3. loc.av. (fig.) une vore svelt:  se al ves dât bade a la prime ispirazion al varès implantât manarie e manarin e al sarès scjampât a cjase a vele (Luigi Gortani, Un paîs misteriôs)
   Sin. di corse , di buride
   
   1. cuntune vore di snait:  dopo pôcs dîs, in grazie di chê scuele, / savevi il mio mistîr, o levi a vele (Emilio Nardini, La Signorine Mie)

Components:

• vele s.f.