zeut
/-ùt/
ze|ut
[AF]
-
s.m.
contignidôr avonde piçul fat pal solit di vencs o sim.:
intun zeut daûr un sterp al veve un bocon di pinze cuete sot lis boris, e al pensave: se la mangji a colazion no 'nd ai par gustâ (Catarine Percude, Il solt del Signôr);
sô sûr e finive di comedâ acis e rochei tun zeut (Maria Forte, Cjase di Dalban);
"Vêso alc di vendi, ta chel zeut?" i veve domandât (Gianni Gregoricchio, Îr e doman)
Sin. ceste
, cestele
, zei
Var. zeiut
-
cuantitât di robe tignude in chel contignidôr:
ce costaressial a cualchi parone di cjase, che e à il celâr ben furnît di cuince e di companadi, a puartâi, cun cualchi scuse, cualchi ûf, cualchi fregul di spongje, il presint dal purcit, un zeut di patatis? (Josef Marchet, Lis predicjis dal muini)
-
s.m.
contignidôr par butâ vie robis:
a vevin mangjât un chilo di mandarins. Nissun zeut par butâ vie lis scussis, e jê lis veve metudis tun gjornâl, e il gjornâl te borse (Agnul di Spere, In viaç di domenie)
