Dizionari de Lenghe Furlane

tet  /-è-/  tet  [AF]

1. s.m. part disore di un edifici, in gjenar inclinade par fâ cori jù la ploie:  une gnot, agns indaûr, al colà il tet de arie par vie di une sbave (Lucio Perès, La strie); in chê volte la antene e jere sul tet dal condomini dulà che e veve sede la radio (Max Mauro, Un Friûl difarent: i 90 mhz di Onde Furlane)
   Sin. cuviert
   
   1. (meton.) puest dulà che si è a stâ, cjase o almancul ripâr cun cualchi comoditât:  je une trupe di puars in zenoglon, / che prein cun devozion / devant il bust di chel om benedet / che ur à lassât murint e pan e tet (Pieri Çorut, La gnot dei muarts); pe sorevivence materiâl des personis: dâ a di ducj un fûc, un tet, alc di mangjâ (Igor Londero, Cuintristorie dal taramot)
2. s.m. part alte e cun funzions di protezion ancje di struturis che no sedin edificis:  montâ il puartepacs sul tet dal automobil
3. s.m. (fig.) nivel massim imponût a une spese, a une sume, a une dinamiche che si pues misurâ in numars e v.i.:  il President nol à fissât un tet al prestit (Riedo Pup, O cun Zico o cence Zico)

Proverbis:

• a sant Benedet la cisile e passe sot il tet, passe no passe, il frêt nus lasse
• no si fâs il tet par une sole ploie