Dizionari de Lenghe Furlane

tabele  /-bè-/  ta|be|le  [AF]

1. s.f. spieli schematic, in gjenar dividût in colonis e caselis, che al permet di viodi e capî dâts, numars, informazions e v.i.:  chei che a àn sot i voi la tabele dal andament demografic di Udin […] a puedin constatâ di bessôi che dal '73, a Udin, a son nassûts 1368 frutins (Riedo Pup, Murî di fam cui camarins plens); te pagjine che e ven subit daûr di cheste chi, si cjate une tabele cui finanziaments dâts fûr de Regjon ai Ents descrits parsore tai ultins 5 agns (Donato Toffoli, Relazion dal Grup di lavôr "Planificazion linguistiche"); te tabele chi parsore si pues confrontâ lis trê lenghis di une volte e il furlan di in dì di vuê (Zorç Cadorin, Cualchi ipotesi sul furlan di prin di scrivilu)
   Sin. spieli
2. s.f. placât, cartel o sim. ancje no dividût in caselis, doprât par avîs o indicazions o tant che insegne:  su la puarte la tabele e mancje di cualchi lampadine, ma si rive a lei "Al Cjaçadôr" (Alan Brusini, Gian Paolo Linda, I forescj); al jere un afâr dut regolâr, cun tant di permès e cun tant di tabele disore de buteghe (Fabian Ros, Il lôf); une biele tabele cu la ponte voltade a tramontan e cu la scrite «Austria» (Riedo Pup, No impaçâsi)
   
   1. [TS] stor. breute di len doprade par antîc par scrivi o dissegnâ
3. s.f. la liste dai cjapitui o des diviersis parts o elements, cul lôr numar di pagjine, che si cjate in principi o in code di un libri, di un scrit e v.i.
4. s.f. liste, che e pues jessi ancje uficiâl e publicade, di personis o sogjets che a àn ciertis carateristichis, ciertis cualifichis, cierts dirits e v.i.:  passâ un esam di abilitazion par jentrâ intune tabele professionâl (Adrian Cescje, Memoriis di politiche linguistiche)
5. s.f. piçul cuadri dât intun santuari par une gracie
   Sin. taulete , tauline
6. s.f. serie dai prodots de moltiplicazion dai numars di 1 a 10 rapresentade intun scheme:  viodìn se tu âs imparât la tabele dal 6! (ARLeF, Fasìn un zûc - La tabele dal sîs)
   Sin. tabeline