soldât
sol|dât
[FO]
-
s.m.
cui che al è coscrit intune armade, militâr cence distinzion di grât o arme, sedi volontari che di jeve:
i soldâts talians, no savint cefâ e a cui ubidî, il 8 di Setembar dal '43, a jerin tornâts a cjase, in buine part a pît (Francesc Placerean, Cuintristorie dal Friûl dal 1866 fint in dì di vuê);
une compagnie sielte di soldâts furlans dal bataion alpins "Cividât" si movè in anticip par cjapà la mont Natpriciar, denant Tulmin (Checo Tam, Just, cence di)
Sin. militâr
-
cui che al è tune armade cence grâts di sotuficiâl o uficiâl:
si tacà a viodi a passâ, ce a trops, ce di bessôi, cun e cence armis, soldâts e uficiâi a messet (Roberto Ongaro, Il muc);
secont lui, un soldât intîr al vâl plui di un caporâl a tocs (Tarcisio Venuti, La cjase di Toni)
-
coscrit in servizi di jeve obligatorie:
"Jo o soi stât soldât cun Guri e ancje a vore in Gjermanie cun lui, e o sai che al è un galantom […]" (Dino Virgili, La aghe da pît la cleve)
-
servizi militâr:
Tita, coragju! jo ti ai niçulât, / ti ai fat da mari, anima, benedeta, / ricuarditi di me là tal soldât (Vittorio Cadel, La Comarona)
-
s.m.
[TS]
zool.
ancje in funz. di adi.inv., tes coloniis di Imenotars e Isotars, ogni individui specializât tai compits di difese:
[lis furmiis] a puartavin i golosets tal furmiâr, par passi ducj chei che no podevin saltâ fûr, ven a stâi i vuardians, i soldâts e lis nenis (Giuliana Pellegrini, Furmiis)
-
s.m.
[TS]
bot.com.
plante erbacie o sufruticose dal gjenar Zinnia cun infloressence a capolin e di plui colôrs vîfs:
juste sot dal barcon e jere une jeche di chês rosis che i todescs a clamin Zinnien. A Ernest i plasevin tanton e si visà che sô mari lis veve tal curtîl e che lis clamave soldâts (Agnul di Spere, In Friûl, nossere)
Polirematichis e espressions idiomatichis
Proverbis:
- bisugne lassâ lâ il mâl jù pai malâts e la vuere jù pai soldâts
- il bon soldât si lu cognòs in vuere
- il brâf soldât si lu cognòs in vuere
- par un soldât no lassin di fâ vuere