Dizionari de Lenghe Furlane

sivilâ  si|vi|lâ  [FO]

1. v.intr. produsi un sun lunc e acût soflant, dome cu la bocje o ancje cuntun strument:  la robe plui stranie e jere che, pardabon, pe vile si cjantave. E si sivilave (Laurin Zuan Nardin, Cjantâ pe vile)
   Var. sivulâ , siulâ
   
   1. v.tr. intonâ une cjançon o une musiche cun chei suns:  pal troi al vigniva il fantat, / par stuart sui riçots la bareta, / sjivulant una cjanta di amôr, / e un curtìs ben guçât inta sacheta (Giorgio Ferigo, Flaba seconda)
2. v.intr. di animâi, mandâ fûr un viers lunc e acût:  i sbîrs che stevin ancje lôr cuiets su la crôs in alt dal tor, come la tampieste si butin di ca e di là, ti zirin e ti sivilin che ti sturnìs (Dolfo Zorzut, La furlane)
   Sin. soflâ
   
   1. di animâi, mandâ fûr un sun, ancje no acût, soflant:  sarpints e magnis in cuantitât a fasevin la vuardie, no lassant vicinâ nissun cristian. Ducj insiemi a formavin un gran circul e a lavin ator ator sivilant (Pieri Menis, Lis leiendis di Buie)
      Sin. soflâ
3. v.intr. produsi un sun acût e lunc:  al ploveve come che al plûf a Biliris tor Sants, e la tramontane e sivilave di tant in tant jù pe nape (Meni Ucel, La ombrene); Garibaldi al rivà propit dongje di nô che o batevin, e lis balis a sivilavin e a fasevin pericul pardut (Maria Forte, Cjase di Dalban)
4. v.intr., v.tr. segnalâ alc cuntun sivilot o cun cualchi aparât acustic:  i machiniscj a alcin un braç e a sivilin trê voltis a saludâ il fi dal caselant sul passaç a nivel fûr Udin (Dino Virgili, La aghe da pît la cleve); cuant che si zuie di balon al è agonisim, scuintri fisic […] ogni tant cualchidun al è frustrât parcè che nol rive a fâ ce che al volarès o parcè che il diretôr di gare no i sivile ce che al varès di sivilâi… (Christian Romanin, Dino Zoff: «O vin lidrîs buinis, o vin di tignîlis di cont»)
5. v.intr., v.tr. fâ siviladis par pandi disaprovazion, contrarietât, insodisfazion, critiche e v.i.:  int che e urlave, e sivilave, che e butave sui soldâts scussis, verdure… a jerin i ultins colps di convuls di chê «setemane rosse» che e veve imboreade dute la Romagne (Pieri Menis, Sul agâr)
6. v.tr. dî fûr cu la vôs che e somee un sivîl:  "Divueli che tu murissis!" i sivilà su la muse, e cuntun scart e deliberà il manuvri (Gianni Gregoricchio, Trê feminis); «Butait via chel imprest!» a i sivilà inmò la Mita e, post che a na lu molava, a i cjapà il spiçot e a i fasè dâ un svual (Novella Cantarutti, Il spiçot)
   Sin. soflâ
   
   1. (fig.) fevelâ parsot:  e capive che cualchidun al è bon dome di sivilâ, come il madrac e che un borc al scuen nudrîsi di peteçs se no nol vîf (Maria Forte, La tiere di Lansing)

Polirematichis e espressions idiomatichis

• cjante o sivile loc.av., loc.inter.
• sivilâ lis orelis loc.

Proverbis:

• i bêçs dai predis a vegnin cjantant e a van vie sivilant