Dizionari de Lenghe Furlane

resistence  /-èn-/  re|sis|ten|ce  [FO]

1. s.f. azion e sfuarç par fâ cuintri a cdn. o a alc, sedi materiâl che imateriâl:  [tal 1848] a Udin, il gjenerâl Auer, al consegnà, cence nissune resistence, la citât e lis dôs fuartecis furlanis al Comitât provisori (Josef Marchet, Cuintristorie dal Friûl fin sot la Italie); par une vere autonomie regjonâl, invezit, lis resistencis de plui part dai partîts a restavin fuartis (Max Mauro, Un Friûl difarent: i 90 mhz di Onde Furlane)
   Sin. oposizion , contrast
   Var. resistenzie
2. s.f. capacitât di operâ e di durâ intun sfuarç, intun lavôr, intune funzion e v.i., sedi fisic che psicologjic, o di restâ salt intune situazion negative, di sopuartâ dolôr, mâl e v.i.:  la none no veve plui la resistence di une volte. Par jê a jerin strachis di cjoli il flât, dome a lâ sù par adalt (Maria Forte, Cjase di Dalban); "[…] el pes lu frizin la sere prime e lu metin a polsâ intune grant tirine, cuviart di zevole cuete tal vueli e asêt […]" "Robe grevie…" "Secont la resistence dal bultric!" (Arturo Feruglio, Viaç a Vignesie)
   Cfr. fuarce
3. s.f. (fig.) fermece, ancje morâl:  ogni sclariment i veve indebilît la resistence di femine oneste (Maria Forte, Mabile la Lunghine)
4. s.f. proprietât di un materiâl di tignî a colps, scjassadis, trazions e v.i., cence sclapâsi, rompisi, çoncjâsi, disformâsi, vuastâsi e v.i.:  lis RPM, ultimis nassudis jenfri i materiâi di costruzion, a son des maltis in stât di dâ resistencis mecanichis ancje plui grandis di chês furnidis dai betons armâts plui bogns (Alessandro Bachiorrini, Maltis armadis pes struturis dal tierç mileni)
5. s.f. [TS] sport capacitât di un atlete a fâ un sfuarç che al dure a dilunc, massime intes garis tant che la marcje, la corse di lungje distance e v.i.
   
   1. complès di garis o di dissiplinis che a domandin un sfuarç di lungje durade
6. s.f. [TS] fis. ogni fuarce che e contraste la fuarce agjente
   
   1. intune machine semplice, fuarce che si vûl anulâ o ridusi cuntune altre
   2. fis., tecn. proprietât di sostancis, materiâi, struturis e sistemis di resisti a solecitazions
7. s.f. [TS] eletr. viôt resistence eletriche
   
   1. (impropr.) element di circuit che al à di dâ une cierte resistence eletriche ae corint, viôt resistôr :  si è brusade la resistence de lampadine
8. s.f. [TS] biol. disposizion di un organisim a oponisi ai agjents esternis che a puedin metilu in dificoltât, tant che atacs di microorganisims, di sostancis tossichis e v.i.:  otignî gnovis varietâts che a metessin dongje la resistence a lis malatiis cuntune buine cualitât de ue e dal vin (Enrico Peterlunger, Lis varietâts di vît resistentis a lis malatiis)
9. s.f. [TS] stor. oposizion armade cuintri di une ocupazion o di une ditature, spec. cun riferiment ae lote partigjane cuintri dai naziscj e dai fassiscj:  Antifassisim, Resistence e Liberazion a son alc di impuartant par dut il Friûl (Marc Stolf, 25 di Avrîl: Fieste de Liberazion, Fieste dal Friûl)
   
   1. la epoche cuant che a jerin chescj grups:  dilunc de Resistence, a nivel teoric juridic, e fo elaborade la Cjarte di Chivasso (19 di Dicembar dal 1943) che e declarave il dirit "a doprâ la lenghe locâl […]" (Odorico Serena, Il furlan tes scuelis e te universitât)