plet1  /-è-/  plet  [CO]

  1. adi., s.m. che, cui che al à la gobe:  un vecjo dut plet, cuntune velade lustre, un barbon fin ca, un pâr di ocjâi e un bastonat in man (Bruno Paolo Pellarini, L'anel striât)
    Sin. gobut , gobit , gobo , pleât
    1. che, cui che al sta pleât injù:  li dal poç, lis feminis pletis a lavavin il lidric di cene (Dino Virgili, La aghe da pît la cleve); e viodè tal ort sô agne, che e gjavave la jarbe, plete suntun strop di ledric (Jolanda Mazzon, Di là de rêt)
    2. ancje di part dal cuarp, che e sta injù par deformazion o par posizion momentanie:  al si justave la cengle de sclope che i passave su la spadule inmò fuarte, ma za plete (Alan Brusini, Il coragjo de sclope); chês schenis pletis prin da la ore sot il pês de cjame fisiche e morâl (Antoni Beline, Sant Jacum, là che al finìs il mont)
    3. ancje di plante, di part di plante o di cualsisei ogjet o struture, pleât o butât jù:  là in bande une puere gjambe di blave plete, li ladrîs dutis scuviartis fûr da tiare (Dolfo Zorzut, Chel cjamp ta gravis)