Dizionari de Lenghe Furlane

ospit  /ò-/  os|pit  [AF]

1. s.m. cui che i ven dât acet e che al ven cjapât in cjase, par une visite plui o mancul lungje:  [te fieste] Mê mari e passave di un ospit a chel altri, ridint a ducj, plene di gracie cun ducj (Carlo Sgorlon, Il dolfin); […] podê stâ a mangjâ cun lôr, ducj i 27 vons, gjenitôrs, fradis, sûrs e nevôts, plui cualchi ospit che al passe par câs (Igor Londero, Un blanc e un neri); [Dante] al è muart vie pe gnot dai 13 di Setembar dal 1321, esiliât a Ravene, ospit dai siôrs di chê citât, ven a stâi i da Polenta (Angelo Floramo, La grandece di un autôr universâl condanât al esili par simpri)
   Cfr. invidât¹
   
   1. cui che al è lozât tune struture di acet:  a lerin jù de cjamare [dal albierc] par cenâ. I ospits a jerin ducj daûr a mangjâ, cjacarant sot vôs (Agnul di Spere, Zûcs di Istât)
   2. (eufem.) persone che e à di stâ intun puest, ancje no vulintîr o ancje cuintri de sô volontât:  e jere jentrade la infermiere di gnot par visâlu che tal doman al sarès rivât, dal ospedâl dongje, un gnûf ospit che i varès fat buine compagnie (Franca Mainardis, Aiar di cjase); o ai pensât di cumbinâle cussì: tu e il to amì o sarês nestris ospits par cualchi timp, juste chel che covente par distrigâsi di une ciarte robute! (Stiefin Morat, Donald dal Tiliment)
2. s.m. cui che al ven a visitâ un teritori, une citât e v.i.:  la pussibilitât che il turist, l'ospit forest al podès cognossi ancje l'aspiet culturâl e linguistic dal Friûl (Dree Valcic, La fam e ven mangjant)
   Sin. visitadôr , turist
3. s.m. cui che al è invidât a di une manifestazion, a di un spetacul o altri:  intes trasmissions [Mauro Tosoni] al slargje la partecipazion di ospits (Max Mauro, Un Friûl difarent: i 90 mhz di Onde Furlane)
   Sin. invidât¹ , intervistât ipon.
4. s.m., adi. [TS] sport scuadre che e zuie sul cjamp di une altre:  sierât il prin timp cence goi e cui ospits che a provin a fâ rindi la superioritât numeriche, la seconde frazion e mostre un Udin che al tire fûr snait e caratar par fâi cuintri ai aversaris (Marc Stolf, Udinese - Bologna 1-1)
5. s.m. [BF] cui che al ospite un visitadôr o un invidât:  une dì Don Franziskus mi à puartât a Grau, li di un so amì che al gjestive un ristorant. […] Il nestri ospit al veve un mût di fevelâ une vore cuiet (Checo Tam, Don Franziskus e Iskander)
   Sin. anfitrion , paron di cjase
6. s.m., adi. [TS] biol. organisim vegjetâl o animâl là che al vîf un parasit
7. s.m., adi. [TS] embriol., med., chir. individui che i si fâs un traplant