nêf
nêf
[FO]
-
s.f.
precipitazion atmosferiche fate di cristai di glace tacâts intune a fâ piçui flocs blancs:
difûr al neveave a grancj flocs blancs e la nêf si ingrumave sui cuvierts, sui ramaçs dai lens, sui pins, pardut (Pieri Menis, Nadâl ancje par Gjelmin);
e colave une gjambe di nêf che al pareve fin un sium (Alan Brusini, Come tai romançs);
e jere za gnot, une nêf sute, farinose e veve scomençât a colâ, fisse fisse, mulinade, sburtade dal tramontan e de buere che e scombatevin tra lôr (Pieri Somede dai Marcs, Nardon e Vigjute di Nani)
Cfr. robe glaçade
, neveâ
, faliscjâ
, brosate
, brosatâ
-
tant che element di riferiment pal so colôr blanc e net:
tele di lin, ricamade e blancje come la nêf (Pieri Menis, I sioperos dal muini)
Polirematichis e espressions idiomatichis
Proverbis:
- a palâ nêf e a spacâ coculis, dut lavôr dibant
- ai doi di Fevrâr tante nêf che al è clâr
- al è miôr lâ a durmî cui çucui che no lâ discolçs a palâ nêf
- an di nêf, an di ben
- copâ int, palâ nêf, sbroiâ morârs e spacâ coculis, al è dut timp pierdût
- cuant che la nêf e je su la mont Pinêt, par dut il mont al è frêt
- cuant che la prime nêf e ven al plan, pocje nêf in chel an
- cuant che lis urtiis a àn la rose fin da pît, e ven une vore di nêf ancje al plan
- in trê dîs la nêf e va vie: Sant Zuan, Sant Pieri e Sant Jacum
- la nêf daspò Nadâl no fâs solâr
- la nêf denant Nadâl e dure tant che l'açâl
- la nêf denant Nadâl e fâs solâr
- la nêf i uciei no le àn mangjade
- la nêf prin di Nadâl e je dute di regâl
- nêf in mont, frêt al plan
- pocje faie, pocje nêf; trope faie, trope nêf
- Sante Catarine la nêf a la culine, Sant Bastian la nêf al mont e al plan
- sot de nêf pan, sot de ploie fam
- sot ploie fam, sot nêf pan
- tant alt al va il scriç, tant alte e ven la nêf
- tant durassie la triste vicine come che e dure la nêf marçuline
- trê voris a son dibant: palâ nêf, bati coculis e copâ oms
- trê zulugnis e po la nêf