muinie
/-ìn-/
mui|ni|e
[AF]
-
s.f.
femine che e fâs part di un ordin monastic, che e à cjapât i vôts di castitât, ubidience e puaretât e che si è impegnade al rispiet di une regule:
di chês bandis al jere ancje un convent di muiniis, cul non di sant Agostin (Dino Virgili, La Çucule);
Jacum lu palpâ a lunc, intant che il miedi zovin e la muinie i tignivin i braçs; al domandâ che i misurassin la pression (Amedeo Giacomini, Tal ospedâl);
«Mariute, cheste e sarà dute robe tô, ma tu âs di lâ muinie». « Muinie?››. «Sì, muinie». […] « Mari, se o lavis muinie vô, no vevi pinsîr di lâ jo» (Maria Forte, La fie çuete)
Var. munie
, mugnie
, mugne
-
s.f.
[CO, TS]
entom.com.
non comun dai insets dal ordin dai Mantoideus, in particolât di Mantis religiosa
-
s.f.
[CO, TS]
entom.com.
non comun dai insets dal gjenar Libellula, cun cuarp lunc e fin, alis lungjis e dispès coloradis
Sin. predi
, svuarbevoi
, svuarbecjavai
-
s.f.
[CO, TS]
entom.com.
pavee di gnot dal gjenar Lymanthria, che cuant che e je tal stadi di ruie e tache lis Conifaris
-
s.f.
telâr di len e metal là che si poie il scjaldêt cuant che al ven metût intai bleons:
cui che nol veve la slite, si rangjave come che al podeve, puartant vie di cjase l'unic imprest che i podeve someâ, la «muinie» (Manuela Quaglia, E ven jù che Diu le mande);
la muinie in jet / a pene gnot, / po il scjaldejet / cuant che va sot (Pieri Çorut, La sfredulise)