mecanic
/-à-/
me|ca|nic
[AF]
-
adi.
relatîf ae mecaniche tant che part de fisiche, che al rivuarde il moviment par mieç di fuarcis e la sô descrizion:
analizâ lis tensions mecanichis dai materiâi omogjenis come il veri o il plexiglass (Marisa Michelini, Alberto Stefanel, La polarizazion de lûs);
maltis in stât di dâ resistencis mecanichis ancje plui grandis di chês furnidis dai betons armâts plui bogns (Alessandro Bachiorrini, Maltis armadis pes struturis dal tierç mileni)
-
adi.
di imprest, che al funzione cun mecanisims, cun parts articoladis tra di lôr in mût di trasmeti il moviment o di produsi un ciert efiet:
si trate di fâ subit ce che si rive cence imprescj mecanics, tirant fûr dai rudinaçs personis e robis restadis sot (Igor Londero, Cuintristorie dal taramot)
-
adi.
des machinis e dai mecanisims, che al à a ce fâ cu lis machinis o cui mecanisims, che si fâs doprant machinis e v.i.:
une societât […] e invià doi grancj stabiliments industriâi, un de filadure e tentorie tal paisut di Tor, chel altri de tiessidure mecaniche a Rorai Grant (Adrian Cescje, Liniis di storie sociâl e economiche dal Friûl 1500 - 1800)
-
adi.
(fig.)
che al sucêt o che si fâs cence l'intervent de volontât o cence sfuarç, cence atenzion o cence bisugne di fantasie o sim.:
al misurave cuntun calcul mecanic ancjemò un viaç la distance di se dal flum, e po la largjece dal flum (Agnul di Spere, Cjalant la rive)
Sin. automatic
, involontari
, spontani
-
adi., s.m.
cui che al ten regoladis, al met a puest, al comede, al perfezione machinis e mecanisims:
Loris al lave a vore a Udin, garzon di mecanic, li di Tuniç, in puartis di Puscuel (Dino Virgili, La aghe da pît la cleve);
al tocje rangjâsi ancje a comedâ il tratôr, se tu vûs doprâlu subit: se tu vadis dal mecanic e covente une setemane par che tal metin a puest (Marta Vezzi, Ravasclêt. Aziende agricule di Edda De Crignis)