iscrizion
/-òn/
is|cri|zi|on
[AF]
-
s.f.
azion e risultât dal iscrivi e dal iscrivisi, soredut tal sens di meti tune liste o di dâsi in note tune liste:
o disdetarai la iscrizion ae universitât di culì e o larai a iscrivimi il plui lontan pussibil (Gianni Gregoricchio, Storie di Ide)
Var. inscrizion
-
s.f.
scrite fate incidint un materiâl dûr:
a rivarin sot l'arc di Costantin. Si meterin a lei lis iscrizions che si cjatavin alì, scritis in latin, e lôr no capivin nuie (Tarcisio Venuti, Storiutis di paîs);
Gregorutti, stuf che nissun gji pense, al met insieme e al spieghe li ultimi iscrizions di Aquilee, par mandâgjilis al prof. Brusin (Ugo Pellis, Dôs cjacaris di Vencul - Prefazion a Instoriis e liendis furlanis)
-
scrite avonde grande, in gjenar celebrative, ancje no incidude:
al parà jù la iscrizion sore la puarte de farie, e al so puest a 'nt tacà sù une altre plui modeste che e diseve: "Ogni mês si fâs la lune, / Ogni dì si impare une" (Luigi Gortani, Il mestri sore ducj i mestris);
in sumis il rinfresc durà cuatri oris. / Picjai po tel tinel cualchi iscrizion, / fate par la ocasion, / che fo laudade un mont (Pieri Çorut, Il rinfresc)
Sin. scrite