inzirli
/-ìr-/
in|zir|li
[AF]
-
s.m.
sensazion che il cjâf al ziri, che e pues puartâ ancje a colâ o a vê imbast:
al jere colât di une scjale par vie di un inzirli (Lucio Perès, Gno barbe Sisto);
si jere inacuarte tal dismontâ dal jet une dì a buinore, che i jere vignût inzirli e un scûr devant dai voi (Dino Virgili, La aghe da pît la cleve);
di une bande a soreli jevât, lis cretis fantastichis dal Jôf di Montâs che a fasin vignî inzirli di tant altis che a son: di chê altre il paisut vistût a blanc, sot i pîts, che al fâs inzirli di tant che al è bas (Josef Marchet, Il cjanâl vistût di blanc)
Sin. zirament di cjâf
Var. zirli
-
s.m.
(fig.)
pierdite momentanie dal ecuilibri psicologjic:
Tilde, par tant fuarte che e fos, e ve un moment di inzirli. E strenzeve la letare e no veve fuarce di vierzile (Gianni Gregoricchio, Trê feminis)
Sin. clopament
-
s.m.
(fig.)
sensazion o esperience une vore fuarte, che e strissine tant che un gorc:
cjapâts dal inzirli dal desideri, ognun al donà a chel altri il propri cuarp (Roberto Ongaro, Il muc)
Sin. gorc
-
s.m.
(fig.)
sucession svelte e sfolmenade di personis, fats, pinsîrs e v.i.:
[te poesie di Otmar Mainardis] intun inzirli di simbui e visions che a partegnin insiemi al passât plui lontan, ae ete de invasion veneziane o al presint plui moderni, i Furlans a vegnin assimilâts ai Celtis (Sandri Carrozzo, Otmar Mainardis)