cric cric [AF]
- fonosimb., s.m. vôs che e imite il rumôr di un moviment o di colp sec, spec. di un argagn mecanic o di alc che si romp: cric cric cric cric… Chel maledet carûl no mi da tregue (Checo Tam, L'orloi de muart); la glace si sclapave cun cricons che si sintiviju fintremai tal paîs (Dino Virgili, La aghe da pît la cleve); "Al è sucedût vie pe gnot; a son capitâts tant che fantasimis, cence un sunsûr, un cric, a jerin za tal jet a cjolilu […]" (Roberto Ongaro, Il muc)
- s.m. (fig.) segnâl, element che al pant che alc, ancje di imateriâl, al tache a rompisi: il prin cric te lôr armonie (Maria Forte, Mabile la Lunghine)
- s.m. dispositîf, cuntun boton, une piçule jeve o sim. che al vierç o siere un circuit eletric o che al invie o al ferme alc: il difiet al jere tal cric a trê cuarts dal fîl che nol contatave e nol discontatave secont che o lavi cjalcjantlu (Meni Ucel, In cjase); par un moment no rivi nancje a capî dulà che o soi. Dulà isal il mûr? Dulà il cric de lûs? (Checo Tam, Cirî gnot)
- s.m. sisteme di sieradure cu la stesse funzion dal boton, ma cence asule, formât di dôs parts che si tachin o distachin a pression: li femini di là sù a i crompavin dome cordela nera di lana, spagli e tela penza par fâ fodri e centini a li scarpeti, cualchi forcheta o una cjarta di crics, guseli e batons (Novella Cantarutti, Marcjadants)
- s.m. dolôr o contrazion muscolâr che e bloche une articolazion: strucjant une zaie di ledan, / vinars di sere, al pià un cric te schene (Pieri Çorut, Bolzan e la sô sagre); par vie dai dolôrs reumatics mi è capitât un cric te spale (Arturo Feruglio, Viaç a Vignesie)
- s.m. piçule binte che si dopre par tirâ sù un pôc un automobil cuant che si à di cambiâ une ruede