Dizionari de Lenghe Furlane

cjace¹  cja|ce  [FO]

1. s.f. ativitât di cjapâ e copâ animâi, fate di altris animâi o dal om:  par capî la grande passion che o ai pe cjace, bisugne che al sepi che o soi fi di cjaçadôrs cognossûts (Arturo Feruglio, 15 di Avost); al è dificil stabilî di cuant che l'om preistoric al è stât bon di disvilupâ tecnichis di cjace adatis a copâ predis di grandis dimensions (Andrea Pessina, Gaetano Vinciguerra, La preistorie in Friûl); si sintive come cuant che di fantat al lave a cjace, e par oris e oris i vignivin a tîr dome scriçs e favitis, e po dopo al saltave fûr di colp il jeur o il fasan (Carlo Sgorlon, Prime di sere)
   
   1. ancje ativitât di cjapâ bestiis di aghe:  o pacjavi intai roiuts in cjace di gjambars e di crots (Gianni Gregoricchio, Trê feminis)
      Sin. pescje
   2. (fig., scherç.) ancje ativitât di cjapâ sù plantis, foncs e v.i.:  lâ a cjace di sparcs di bosc
2. s.f. azion di cjapâ e copâ animâi, fate di altris animâi o dal om e prede o cuantitât di predis cjapadis e copadis intune volte:  lis tauladis des cenis dal Cuel dopo une cjace (Nadia Pauluzzo, Il bintar); "Prime che al suni dì / cu la sclope doman che al vegni in place. / Al viodarà ce cjace! (Enrico Fruch, Il jeur)
   Sin. cjaçade
3. s.f. ricercje di cdn. par cjapâlu e fermâlu:  la polizie e je in cjace dal lari
   
   1. (fig.) il cirî cdn. par cualchi interès:  al va in discoteche, ma plui a cjace di feminis che no a balâ
4. s.f. ricercje o brame di alc:  lis robis a cambiaran co lis Americhis a deventin une cjace al aur e a lis ricjecis presintis (Sandri Di Suald, Comunicâ la autonomie); al jere simpri a cjace di sensazions gnovis (Carlo Sgorlon, Ombris tal infinît)
5. s.f. milit. intune vuere, azion di ricercje e distruzion di avions o nâfs di bande di altris avions o nâfs
6. s.m.inv. milit. avion impegnât tal distruzi i avions nemîs in svol:  il Fokker Dr. I al è stât il cjace plui famôs tra chei pilotâts dal Baron Ros
7. s.f. [FÛ, TS] sport in zûcs cul balon, lûc li che e sbalce la bale

Polirematichis e espressions idiomatichis

• cjan di cjace loc.s.m.
• lâ a cjace loc.v.

Proverbis:

• cjace che no si viôt e je cjace mate
• cui che al vûl un cjan di cjace che lu cjoli di raze