Dizionari de Lenghe Furlane

citadin  /-ìn/  ci|ta|din  [FO]

1. adi. de citât e dai siei abitants, ancje in confront o in contrast cun chel che al è tipic de campagne:  il trafic citadin al è teribil; al jere fi de borghesie citadine. Educadin, di profîl delicât (Gianni Gregoricchio, Trê feminis); i conseîrs comunâi a rapresentin la comunitât citadine cence vincul di mandât (Aministrazion Publiche, Statût dal Comun di Udin)
   Sin. urban
   Var. sitadin , zitadin
   
   1. ancje in confront o in contrast cun chel che al è tipic de campagne:  mio marît capissial… nol viôt nancje lui trop di bon voli cheste mode citadine [lâ ator cui braçs scuvierts, cence maniis] che e stone une vore tun paisut come chest (Costantino Smaniotto, Co l'amôr al cimie)
      Sin. çavatin
2. s.m. cui che al vîf intune citât:  al veve miôr sì i siei montagnârs ruspis, scontrôs, ignorants - ma ancje bogns e ricognossints - che no i siôrs di citât che a podevin paiâ ducj i professorons e lis medisinis che a volevin; tant i citadins no vevin bisugne di lui (Pieri Somede dai Marcs, O sielç lis stelis); la biele e je che i citadins a volaressin vê il lat, il formadi, la spongje gjenuins e bogns ma no lis vacjis e il ledan (Riedo Pup, I furlans e il ledan)
   
   1. ancje in contrast cun chei che a vivin in campagne:  la sô figure graciose, i cjavei colôr di stranc, la sô ciere palide, il so trat di citadine a parevin escludile dal gno mont di fantat di montagne (Carlo Sgorlon, Il dolfin)
      Sin. çavatin
3. s.m. cui che al gjolt dai dirits civîi e politics di une comunitât:  Sauli al jere ebreu ma al jere ancje citadin roman e, ta chês regjons alì, jentradis di trê secui inte orbite elenistiche, si fevelave soredut grêc, e aramaic, lenghis che lui al saveve ben (Checo Tam, Conversions); in fuarce dal articul 50 de Costituzion, che al lasse a ogni citadin de Republiche facoltât di presentâ petizions (Adrian Cescje, Memoriis di politiche linguistiche)
   
   1. cui che in gjenerâl al fâs part di une comunitât:  politichis linguistichis virtuosis e rispietosis dai dirits dai siei citadins i garantiressin [ae regjon] une incressite sociâl, civîl e economiche, come che al sucêt in cetantis altris bandis in Europe (Donato Toffoli, Relazion dal Grup di lavôr "Planificazion linguistiche"); judâ a rindi cussients i citadins su la impuartance de agriculture a pro de societât (Stefania Troiano, Il valôr de agriculture pe societât: la multifunzionalitât)
4. s.m. (fig.) membri di une comunitât ideâl:  citadin dal mont; si resone sul valôr che a àn lis lenghis te formazion dai citadins globâi di doman, un obietîf une vore impuartant pes scuelis (Mario Dutto, Scuelis di cualitât e lenghis di minorance. Une riflession su la lenghe furlane intes scuelis)