Dizionari de Lenghe Furlane

cemût  ce|mût  [FO]

1. av. in proposizions interogativis diretis e indiretis, in cuale maniere, intes costruzions cence la enclisi dal pronon subiet aton al à scuasi simpri:  cemût vadie?; cemût vêso fat a cjatâmi?; scoltâ chê vôs… Cemût vivi une zornade cence scoltâle? (Dino Virgili, Emme come mamma); cemût staiso?; al voleve lâ a viodile lui cheste bancje cemût che e jere fate (Fabian Ros, La rambe)
   Var. cimût , cemôt , cimôt , cemont
   
   1. se il verp de interogative al è tun mût finît e nol à il pronon subiet aton tacât in code, dopo di "cemût" si cjate scuasit simpri "che":  contimi: cemût che ti è lade in feriis?; viodarìn cemût che e larà a finîle (Marc Stolf, Al è un judiç a Berlin. E a 'nd è un ancje a Rome)
   2. ancje cence verp, par domandâ su la salût o su la maniere che a van lis robis in gjenerâl:  "Bundì, Toni. Cemût?" "Avonde dai, si tire indevant, po"
   3. ancje cence verp, par domandâ al interlocutôr di tornâ a dî:  scuse, cemût?, no ti ai sintût ben
      Sin. ce¹
   4. ancje cun proposizion sotintindude:  la Livence e nas alì. E no si capìs cemût: no si capìs se e ven fûr de crete o se e nas dal fonts come une grande risultive (Dino Virgili, Un riul tra Venit e Friûl)
2. av. simpri in cumbinazion cun "che", al introdûs proposizions modâls:  cemût che si à za dite chest dizionari al dopre la lenghe furlane di riferiment, che i si dîs ancje furlan standard o coinè (Sandri Carrozzo, Jentrade dal DOF); Min al è un frut. Tirât sù lavorant, cemût che a usavin tirâ sù i fruts in chei agns (Ivano Urli, Storie di Min)
3. s.m. doprât dome tal sing., par pandi la maniere, il mût:  i veve dât un apontament cence nancje dîi la ore, il dulà e il cemût (Fabian Ros, Eivissa mon amour)

Polirematichis e espressions idiomatichis

• cemût la bighe loc.

Proverbis:

• cemût tegnial cont dai altris cui che nol ten cont di se?