canevace
/-và-/
ca|ne|va|ce
[CO]
-
s.f.
toc di tiessût, doprât soredut par netâ, suiâ, cjapâ robis cjaldis o sporcjis cence scotâsi o sporcjâsi e v.i.:
a bastin une canevace e vueli di comedon par netâ la cjase (Raffaele Serafini, Soreli jevât a mont);
«Ce fâtu?» i domandà jê, che e veve finît di lavâ lis tacis e e jere daûr a tornâ a picjâ la canevace (Mario De Apollonia, Il timp par ledrôs)
Sin. peçot
-
retangul di tiessût par suiâsi:
Rosute cu la canevace su la spale, la blancjarie di cambiâsi sul braç, il savon in man, e ta chê altre il seglot e jentrà te stanzie, si tirà la puarte daûr (Dino Virgili, La aghe da pît la cleve);
sentât in cusine a sbolseâ cul cjâf sot la canevace dai fuments di malvis (Alan Brusini, Come tai romançs)
Sin. suieman
-
s.f.
toc di tiessût di pôc valôr o in brutis cundizions:
e veve viodût di brut voli chê tavaie su la balaustre pe comunion gjenerâl, mâl sopressade, contose, spergotade di cere, maglade di rusin, cul merlo a sbrendul. No veve ricevût vulintîr il Signôr su chê canevace (Pieri Menis, I sioperos dal muini)
Sin. peçot