assemblee
/-blè-/
a|ssem|ble|e
[CO, FO, TS]
-
s.f.
riunion, spec. cun tante int, par discuti di cuistions che a interessin ducj:
une ricostruzion [dopo dal taramot dai 6 di Mai dal 1976] che e à vude la sô Vierte tes tendopolis, tes assembleis, te autogjestion e, come che cualchidun al à dit, te anarchie (Igor Londero, Cuintristorie dal taramot);
il 2,6% de popolazion al declare di no capî il furlan ma e je une percentuâl che e baste par fâ scatâ il mecanisim dal ûs de lenghe taliane in cuasi ogni assemblee (Linda Picco, Ricercje su la condizion sociolenghistiche dal furlan)
Sin. adunance
, riunion
Var. samblee
, semblee
-
s.f.
[CO, TS]
dir.
orghin deliberatîf di une societât, di un ent e v.i.:
la assemblee dal Cfl2000 e votà la relazion dal president Agnul Pitane che e impegnave il consorzi a continuâ lis voris cemût che a jerin stadis scomençadis (Adrian Cescje, Memoriis di politiche linguistiche)
-
s.f.
[CO, TS]
dir.
orghin legjislatîf o consultîf di une istituzion:
te assemblee parlamentâr de Patrie dal Friûl la famee dai Darcjans e veve une funzion di prin plan (Luigina Di Giusto, Andrea Guaran, Mauro Pascolini, La culine furlane)