amâ
a|mâ
[AF]
-
v.tr.
vê un sintiment profont di afiet e benvolence par cualchidun o par alc:
e amave la gneçute cun dut il so cûr grant (Maria Forte, Cjase di Dalban);
si jere sintude tradide di chei che plui e amave, di chei che jê e veve plui fiducie (Roberto Ongaro, Il muc);
no tremavial ancjemò come in chê volte nome a pensâ a chê frute fuarte e biele che al veve amade a vincj agn? (Pieri Menis, Sul agâr);
la veretât a è che ducj si ame il so paîs: là che si nas ogni jerbe pas (Luigi Gortani, Al marcjât di Vile)
Sin. volê ben
, volê bon
-
v.tr.
vê une grande passion o predilezion par une ativitât, par une dissipline, par un lûc, par un argoment e v.i.:
[chel langobart] nol jere un popul che nol amàs la art, nol jere un barbar (Francesc Placerean, La nestre storie)
Sin. vê passion
-
v.tr.
(fig.)
vê une inclinazion, une vocazion o une bisugne:
la vît e ame la culine (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
Proverbis:
- al è miôr fâsi amâ che no temê
- ame cui che ti ame e rispuint a cui che ti clame
- amôr e signorie no amin compagnie
- bisugne temê Diu par amôr e no amâlu par timôr
- cuant che si ame, si tem
- cui che al ame al tem
- cui che al ame ducj nol ame nissun
- cui che al ame i gjats al ame ancje lis feminis
- cui che al ame il Signôr al ame ancje i sants
- cui che nol ame nol à cûr
- il becjâr nol ame il pescjadôr
- ogni simil al ame il so simil
- se tu amis a son ducj bogns, se tu odeis a son ducj triscj
- si amin tant che il cjan e il gjat