Zenâr
Ze|nâr
[FO]
-
s.m.
prin mês dal an, di trenteun dîs intal calendari gregorian e julian:
il 17 di Zenâr e je la fieste di Sant Antoni abât, che a Biliris si clamilu plui vulintîr Sant Antoni des bestiis, o ancje (naturâl, cence ofese) Sant Antoni dai purcits (Meni Ucel, I colaçs);
ai 28 di Zenâr al rivà il gnûf sorestant, dut braurôs e sigûr di se (Antoni Beline, Pre Pitin)
Cfr. mês1
Proverbis:
- cuant che a businin lis moscjis di Zenâr, slargje il braç piorâr; cuant che a businin lis moscjis di Fevrâr, strenç il braç piorâr
- di zenâr al è bon il rovedâl
- di zenâr la gjaline tal gjalinâr
- Diu nus vuardi di un bon Zenâr par podê jemplâ il granâr
- la ombrene dal mês di Avost e fâs dulî la panze il mês di Zenâr
- la vacje dal bon bovâr e bute jù il pêl il mês di Zenâr
- lis macis di Zenâr la buine filandere e à di parâlis a ponâr
- Sant Antoni di Zenâr une ore bielavuâl
- se Zenâr nol zenare e Fevrâr nol fevrare, Març mâl al fâs e mâl al pense
- sut di Zenâr al jemple il granâr
- tante poçale di Zenâr, tante ploie di Avrîl