zirandule
/-à-/
zi|ran|du|le
[CO]
-
s.f.
fûc di artifici, pal solit montât suntun pivot, che al zire fasint faliscjis e sivilant:
e in chel: tic tac, fusetis, rochetons, / zirandulis, tambûrs e tamburons (Pieri Çorut, La viele);
a scloparan tal cîl di taponâsi lis orelis e di inceâ i voi bombîts, fusetis e zirandulis (Pieri Somede dai Marcs, L'ultin cordo)
-
s.f.
sorte di lamine montade tun pivot, che si môf daûr dal aiar, segnant la sô direzion:
puare zirandule mê sun chel medili / fate a forme di gjalut ormai rusinît (Amalia Fabbro Durisotti, Puare zirandule);
sul cjampanili / l’aiar / al môf la zirandule di Sant Martin (Mario Argante, Su la curve dal timp)
Sin. sparavint
, bandarole
-
s.f.
zûc di cjarte o di altri materiâl lizêr, formât di une sorte di floc, fissât tun bachet, che al zire mot dal aiar:
lis elichis [...] a corevin compagn des zirandulis che si comprin tes sagris (AAVV, Suntune strade)
-
s.f.
(fig.)
element che al zire o che al cambie svelt, dinamiche svelte, situazion che e cambie svelte o che e je formade di plui elements che a svariin:
cumò jo vuarès savê se son lis zirandulis dei nestris cerviei che fan rondolâ in sta maniera la tiara, o se son i tombolons de la tiara che nus fan lâ ator il cjâf sença sosta (Federigo Comelli, Il me paîs);
Carlin Muraie al capive pôc e nuie di chê zirandule di ideis e di opinions (Pieri Menis, Chei di Muraie)
