veteran /-àn/ ve|te|ran [CO]
- s.m., adi. militâr che al à la esperience di un lunc servizi e di plui campagnis o ex militâr che al è tornât vîf di une vuere: il gjenerâl l'è un veteran, che sot i Francês al ere stât ancjemò in capite des vuardiis nazionâls di Guart cul grât di cjapitani (Giovanni Gortani, Sot consei di vuere); un veteran de vuere de Libie al veve plantât "Dôs Palmis" (che a àn ancje dât il non al ambient "Alle due palme", ndr) (Angelo Floramo, Cuintristorie dal Nûfcent 1950-1960); e esisteve intal cjamp militâr une scuadre di pompîrs metude adun cui soldâts veterans (Barbara Cinausero, A tutele dal prossim: lis organizazions regjonâls dai vigjii dal fûc in Austrie)
- s.m., adi. (fig.) che, cui che al à une lungje esperience intune ativitât, ancje no militâr: un grup di veterans de politiche e de aministrazion cjargnele, impegnâts in chestis setemanis a costituî la "Pro Carnia 2000" (David Zanirato, E torne a nassi la Pro Carnia, une associazion cun lidrîs antighis par promovi resonaments su la Cjargne dal futûr)