spirituâl
spi|ri|tu|âl
[AF]
-
adi.
dal spirt, fat di spirt che al rivuarde il spirt, in oposizion a ce che al è di materie:
la lôr esperience [dai benandants] e jere sì vere, ma dome spirituâl, invisibil, in sium (Sandri Carrozzo, Benandants e Terapeutis / Terapeutidis)
Var. spirtuâl
-
de cussience, de interioritât de persone:
ancje jê e jere une creature cence fuarce spirituâl, come scuasit dute la umanitât (Carlo Sgorlon, Il dolfin);
se une dì chescj valôrs spirituâi a vessin di lâ al mancul, e sarès une brute dì pe nestre civiltât (Lelo Cjanton, Il Strolic furlan pal 1967)
-
s.m.
ce che al à a ce fâ cul spirt:
in fonts il spirituâl al somee che nol impuarti nuie, ma al è une vore impuartant (Francesc Placerean, La vite di chest mont, cence un pôc di spirt, e devente brute e insopuartabile)
-
adi.
che al à a ce fâ cu la religjon:
[Bertrant] al mostrà chel stes calôr e chê stesse fuarce tal guvier spirituâl e temporâl dal patriarcjât (Josef Marchet, Cuintristorie dal Friûl fin sot la Italie)
-
adi.
che al à o che al cîr impostazion religjose o mistiche o che si jeve parsore de dimension dome materiâl:
une vision di tolerance e di pâs, di vision alte e spirituâl de vite, ecumeniche, cressude dentri lis nestris lidrîs aquileiesis (Dree Valcic, No ae sagre dai pampavuacs)