Dizionari de Lenghe Furlane

sperance  /-à-/  spe|ran|ce  [FO]

1. s.f. ancje pl., il spietâsi alc di biel di cdn., di alc, di une situazion e v.i. e ce che si spiete o si imagjine di biel:  Mirco lu veve cjapât il deliri cumò che lis sperancis a cjapavin forme e i sglonfavin il cûr (Alan Brusini, Par stradis lungjis); la Bete i plaseve; e al pensà che ce che nol jere rivât a fâ in chel martars al varès podût fâlu la joibe dopo. E al torne la joibe dopo, cun chê lûs di sperance tal cûr (Meni Ucel, Rosaris)
   Sin. spere²
   Var. speranzie
2. s.f. sintiment o sensazion che si à cuant si previôt che a podaressin sucedi robis positivis:  «Vaî di amôr e ridi di sperance» e diseve mê mari (Alan Brusini, Come tai romançs); la int avilide si tirà di bande, malapaiade e cence plui gran di sperance (Josef Cjargnel, La mont cu la spice discrodeade); Dalban, intant, al passave de sperance al sconfuart par ordin che il timp al lave indenant (Maria Forte, Cjase di Dalban)
   Sin. spere²
3. s.f. ce o cui che al al permet di vê cualchi prospetive positive:  sintimi ben: tu i ti sôs la unica sperança che i vin! (Stiefin Morat, Donald dal Tiliment)
4. s.f. [TS] teol. virtût teologâl, di spietâ cun fiducie la vite eterne e la gracie divine:  par parâsi dal frêt de anime, i furlans a àn di metisi a cjaminâ, a movisi, a progjetâ, e chest al è il don de sperance (Antoni Beline, Sant Jacum, là che al finìs il mont)

Proverbis:

• ancje la sperance e à levan
• cui che si pas di sperance al crepe di fam
• fin che al è flât e je sperance
• fin che si è vîfs si à sperance di viodisi
• la robe plui lungje e je la sperance
• la sperance e je il pan dai pitocs
• la sperance e je il rimiedi dai disperâts
• la sperance e je la ultime a pierdisi
• la sperance e je simpri verde
• la ultime a pierdi e je la sperance
• mai fâ mâl cu la sperance di vê ben
• no bisugne fâ bausiis cun sperance che no vegnin fûr
• no fâ mâl cun sperance di vê ben
• no stâ fâ mâl cun sperance di vê ben
• sperance dai altris, cjapiel di mat