sirene
/-rè-/
si|re|ne
[AF]
-
s.f.
figure de mitologjie classiche cun cjâf di femine e cuarp di uciel, daûr di altris tradizions cun cuarp di femine e code di pes:
l'ingjan di declarâ a Polifem di vê non Nissun, par podê scjampâ, al è tipic des flabis; i lotofacs, lis sirenis, i antropofacs,mostris e divinitâts che a judin o che a fasin cuintri a son tal imagjinari coletîf dai marinârs (Sandri Carrozzo, Pierluigi Visintin, Jentrade de Odissee)
Var. sarene
-
s.f.
(fig.)
femine une vore biele, cuntun podê di seduzion che no si rive a resisti:
si sin postâts sot il barcon siarât de cjamare là che e durmive e o vin scomençât a sunâ [la serenade] impegnantsi a fâlu come che o varessin fat se, invezit di sei cussì brute come che e jere, e fos stade une sirene, un sclopon ancje jê come chês che o ur vevin sunât fin alì (Meni Ucel, Serenadis)
-
s.f.
(fig.)
cui o ce che al à fuarce di atrazion fuarte, ma dome di ilusion, e che al puarte consecuencis pericolosis:
la indiference o ostilitât croniche de citât dal Nunciel, plui sensibile a lis sirenis e a la grandeur dai erêts de Serenissime, che a dut ce che al rivuarde il Friûl (Antoni Beline, Di ca e di là de aghe)
-
s.f.
dispositîf acustic di segnalazion di emergjence:
i pompîrs, par strade, a àn doprât la sirene par vê la precedence (Riedo Pup, La passare di Dedeà);
in chel si sintì di colp lis sirenis dai autos de polizai (Agnul di Spere, Fieste di inaugurazion)
-
in timp di vuere, dispositîf acustic di alarme:
nissun al veve sintude la sirene e i canons dal cjamp di aviazion no vevin sbarât (Pieri Somede dai Marcs, La ultime baronade)
-
dispositîf di segnalazion acustiche in struturis grandis, ancje no di emergjence, pal solit par segnâ un orari o sim.:
chê int e mostrave di savê contentâsi. La sirene dal cantîr e veve un timbri alt e armoniôs, che al someave a chel di cierts letons di orchestre (Agnul di Spere, Int no consumade)