simpatie
/-tì-/
sim|pa|ti|e
[AF]
-
s.f.
armonie o condivision di sintiments o sensazions tra plui personis:
e nel dolôr imens / di vê piardût il nestri Zacarie, / vin cjatât il compens / di vê cressût fra nô la simpatie. / O vin vaiût insieme, e o vaiarìn / simpri insieme co lu recuardarìn (Pieri Çorut, Il nestri dolôr in muart del Arcivescul Zacarie Bricito)
-
s.f.
sensazion positive dade dal stâ ben cun cdn.:
il princip che al veve cjapât simpatie tal gnûf amì lu pree di stâ cun lui un pôcs di dîs (Popolâr - Andreina Nicoloso Ciceri, I trê cjadreons - Racconti popolari friulani I)
-
cualitât di cdn. che e fâs che al sedi un plasê stâ in sô compagnie:
vivarôs, braghesson, plen di risorsis e simpatie, al jere bassarûl e lu vevi cognossût a Padue, student anzian fûr di cors (Alan Brusini, Gian Paolo Linda, I forescj)
-
s.f.
disposizion di anim o inteletuâl positive viers di cdn. o di alc:
o cirìn di lâ indenant, ancje se la plui part dai furlans nus cjale cun simpatie platoniche cence movi un dêt e nus jude nome di peraulis (Josef Marchet, Sudizion, la pecje dai furlans);
la sô posizion e je, e e restarà simpri par dute la sô vite, la plui lontane di ogni simpatie pe Austrie, viodude tant che un Stât autoritari (Donato Toffoli, Il lunari mai jessût - Tellini te prime vuere mondiâl)
-
s.f.
atrazion o interès sentimentâl par cdn.:
"Lis cjacaris a disin che Clare e sarès cjapade di fuarte simpatie… che e sarès cuete…" (Pieri Piçul, Vieri e gnûf)
-
persone che par jê si sint atrazion o interès sentimentâl par cdn.:
la sô prime simpatie, une frutute plene di lints e cu lis strecis rossis (Franca Mainardis, Il sium di Lissandri)
-
s.f.
filos.
in cualchi filosofie dal Rinassiment, fuarce di atrazion che e lee dôs creaturis une cun chê altre
-
s.f.
[TS]
med.
tindince di un orghin dal cuarp a disvilupâ la stesse patologjie o afezion di un altri orghin
-
s.f.
[TS]
chim.
inflùs indiret tra dôs sostancis o fenomens
