segretarie2 /-ì-/ se|gre|ta|ri|e [AF]
- s.f. intun ent public o intune aziende privade, ufici che al proviôt pes pratichis aministrativis e burocratichis, intindint ancje il so personâl e la sô sede: 50 [scuelis] a son ancje cence diretôr dai servizis aministratîfs, ven a stâi cuntune segretarie che e funzione a miezis (Walter Tomada, Plui autonomie pe scuele furlane. La Regjon e cjale a Venit e Lombardie… parcè?); il notiziari, stampât tun numar limitât di copiis, si pues domandâlu al CIRF, lant di persone li de segretarie (Redazion La Patrie dal Friûl, ‘Gnovis in Uniud’ par cure dal CIRF)
- s.f. incarghe e funzion specifiche di segretari, sedi tant che impleât, sedi, soredut, tant che alt responsabil di une organizazion: sui prins agns 80 a nasserin tensions te Aidlcm, che dal 1977 e jere intant passade de Segretarie di Gustavo Burat, piemontês, a chê di Samo Pahor, sloven (Adrian Cescje, Memoriis di politiche linguistiche); une pussibilitât reâl pal popul furlan di no vê di dipendi di segretariis di partît romanis o milanesis (Dree Valcic, Se no cumò, cuant?)