secuestrâ
se|cues|trâ
[CO]
-
v.tr.
gjavâ il possès di alc a cdn. che al è il so proprietari, soredut tant che proviodiment di bande di une autoritât:
il Procuradôr dal Re nol à vût nuie ce dî [sui contignûts dal gjornâl] tant al è vêr che nol à secuestrât il sfuei (Guido Antonioli, Florean dal Palaç, I, 1);
"Doman a vegnin a secuestrâmi dut [par vie dai debits]... Martis i partìs par la Gjermania..." (Ovidio Colussi, Mario Friûl)
-
v.tr.
cjapâ, pal solit puartâ vie, e stratignî cdn. cuintri de sô volontât, in gjenar tant che delit par domandâ un riscat o tant che azion ilegâl o autoritarie di repression:
Març 1978, ai 16. Vuê lis Br, o cui che sot di cheste sigle si plate, a àn secuestrât Aldo Moro (Adrian Cescje, Memoriis di politiche linguistiche)
Sin. rapî
-
v.tr.
(fig., scherç.)
puartâ cun se o impegnâ cdn., fasint che nol puedi stâ cun altris o che nol puedi dedicâsi a cualchi ativitât:
"Nô i domandìn une grazie sole cumò, che no nus secuestri Leandro, che nus al lassi parcè che sence di lui la nestre compagnie e je muarte" (Costantino Smaniotto, Maridâsi...!?)
-
cjapâ e doprâ in esclusive o comandâ come se al fos propri alc che invezit al è di altris o al è coletîf:
il centri-drete al è stât secuestrât dai "Visitors" e puartât vie, sun planets lontans. La "Cjase des Libertâts" si è gjavade fûr de Comunitât politiche dal Friûl-V. J.. Aromai e je alc altri (Luche Nazzi, I postautonomiscj cun Cecotti)