Dizionari de Lenghe Furlane

scognossût  sco|gno|ssût  [AF]

1. adi., s.m. che no si cognòs, che no si sa:  a resonin cun criteris diferents, scognossûts a la puare int (Riedo Pup, Vitoriis e batostis)
   Sin. discognossût
   Var. sconossût
   
   1. che, cui che no si cognòs, che no si sa il non, che no si à vût a ce fâ:  e jeve e ti partìs cun chei doi che a jerin vignûts a clamâle: un fantat e une fantate scognossûts (Pieri Menis, Lis leiendis di Buie)
   2. che, cui che nol è famôs, che nol è innomenât:  oms e feminis di ogni lenghe e fate, sants e barons, devots e imbroions, penitents e profitadôrs, ingjenuis e furbos, grancj e piçui, innomenâts e scognossûts (Antoni Beline, Sant Jacum, là che al finìs il mont)
      Sin. discognossût
2. adi. che no si domine cu la cussience:  e veve dentri, te part scognossude de sô anime, lis lidrîs des tantis umiliazions patidis (Maria Forte, Cjase di Dalban)
   Sin. discognossût
   
   1. che al è gnûf, che no si veve ancjemò sperimentât:  e dentri dal cûr, chê sbisie scognossude di alc altri: e chê sbisie e je alc di lôr, nassût e clucît dentri (Dino Virgili, La aghe da pît la cleve)
3. s.m. ce che nol è cognossût, complès des robis, materiâls e imateriâls, che no si cognossin:  ma il stes Volê svolzintsi inte nature / pûr sore me al decît la sorte scure: / jo pûr cun te pe tiere dispierdût, / o vîf e o voi incuintri al scognossût (Argeo, Cjant di grîs avostans)