sbrudiot /-òt/ sbru|di|ot [CO]
- s.m. (spres.) brût trist, mignestre triste: di mangjâ, nus davin un sbrudiot di rîs, vuardi e fasûi (Enrico Martina, Ricuarts e inlusions); lôr, lis infermieris, si tratavin ben, e no paravin jù pal gosolâr chel sbrudiot di agarole che a davin a lôr vecjos (Franca Mainardis, Aiar di cjase)
- s.m. (spres.) licuit fat di plui ingredients o components di basse cualitât: cuant che su la butilie al è scrit nome «olio d'oliva» [no «extravergine»], no infidâsi: chel al è un sbrudiot che nol è nancje passât par dongje des ulivis (Riedo Pup, I furlans e i talians)
- s.m. (fig., spres.) complès di plui elements, sedi materiâi che imateriâi, che si calcole in cualchi maniere negatîf: si strussie la Filologjiche, / ma jo dîs: cun ce costrut, / se in citât butin di bande / il lengaç di puar Çorut? / E dut cuant, par mignestrânus / un sbrudiot, une misture / che fâs stomit e si clame / un delit cuintri nature (Zaneto, Furlans, fevelait furlan!)