sacrificâ sa|cri|fi|câ [AF]
- v.tr. (ancje ass.) intai cults pagans classics, intal ebraisim e in ciertis religjons no cristianis, fâ une cerimonie copant une o plui bestiis o ancje une o plui personis, o distruzint alc che in ufierte a une divinitât: […] une tumbule li che la liende e meteve la tombe di Pelop, il Pelopion. Li ogni an si sacrificave un cjastron neri (Adrian Cescje, Viaç aes origjins dal Logos)
- v.tr. (fig.) causâ la fin, la distruzion di alc o la muart di cdn., soredut in non di alc di calcolât superiôr: sul altâr dal interès primari dal Stât Nazion a son stâts sacrificâts i dirits fondamentâi di grandis fassis de popolazion (Sandri Carrozzo, La fin dal Stât Nazionâl jenfri ilegjitimitât, inutilitât e paradòs, tal spieli de ipotetiche Riforme Costituzionâl taliane dal 2016)
- v.tr. (fig.) rinunziâ a alc: la Italie no po sacrificâ la ereditât dal Risorziment e la grande epopee dai "Mil" par fâ diferencis tra regjon e regjon (Josef Marchet, Censiment)
- v.tr. (fig.) impegnâ alc o cdn. intune cierte maniere, che in gjenerâl si calcole negative, sfadiose, di pocje sodisfazion e v.i.: un indificil a brincâ, ma che cualchi zornade… le sacrificave a lavorâ co i pocave la fam (Maria Forte, La tiere di Lansing)