romantic
/-à-/
ro|man|tic
[AF]
-
adi.
che al à i caratars dal Romanticisim, che al inten il Romanticisim tant che moviment filosofic e artistic, ancje cun influencis te sfere politiche:
i interès gjeopolitics inglês a lerin in cunvigne cui insumiadôrs romantics di une Grecie liberade (Adrian Cescje, Viaç aes origjins dal Logos);
i mudaments, cun veris rivoluzions, che a son in ete iluministiche e romantiche a puartin po al slargjâsi gjeneralizât, ancje se no assolût, in Europe dai Stâts Nazionâi (Sandri Carrozzo, La fin dal Stât Nazionâl jenfri ilegjitimitât, inutilitât e paradòs, tal spieli de ipotetiche Riforme Costituzionâl taliane dal 2016)
-
s.m.
artist, filosof, esponent dal Romanticisim:
composizions di Mozart, Beethoven, Bach, fin ai grancj romantics tant che Mendelssohn (Alessio Screm, "La vie de musiche", un progjet di confin che al ten dongje tieris e culturis)
-
adi., s.m.
(fig.)
che, cui che al à o al va daûr di une vision idealizade e sentimentâl:
jo o soi un romantic e no un razionâl (Antoni Beline, Fra lis letaris e la politiche);
Odile […] no si sintive la anime poetiche o romantiche (jê si svantave di sei une femine pratiche) (Franca Mainardis, Il sium di Lissandri)
-
adi.
(fig.)
di puest o situazion, che al môf sintiments dolçs, che al à a ce fâ cul amôr o cu la seduzion:
nuie di miôr che un bon risotut, di gjoldisi intune cenute romantiche su la terace al clâr di lune (Margherita Timeus, Risot "moscatel")
