primizie /-mì-/ pri|mi|zi|e [CO]
- s.f. prodot agricul, o ancje rose o pome spontanie o animâl, che al ven cjapât sù par prin intune stagjon: cheste zintîl viole / primizie de stagjon, / la ai destinade in don, / Anute, al to biel sen (Pieri Çorut, Il Strolic furlan par l'an 1824); tes beorcjis il fum de panoglade al segne fieste di ligrie pe primizie dal sorc gnûf (Dino Virgili, La aghe da pît la cleve)
- s.f. [TS] antrop. ufierte rituâl dai prins prodots di une stagjon a une divinitât
- s.f. (fig.) prime espression, manifestazion, realizazion di alc: "A proposit, monsignôr, ce onôr par Grupignan eh, di vê la primizie de sô musiche!" (Bepo Marion, Il liron di siôr Bortul); tornant indaûr ai agns lontans des mês primiziis sacerdotâls, o scuen dî che ancje li si è palesade la misericordie di Diu (Antoni Beline, Il seminari e i prins agns di predi)
