Dizionari de Lenghe Furlane

primât¹  pri|mât  [AF]

1. s.m. il jessi il prin a pet di altris intune cierte ativitât o intun setôr:  solitis bufulis sul primât talian e su la barbaritât di ducj chei altris umign (Josef Marchet, Scuele incurabil)
   Sin. supremazie , superioritât
   
   1. [TS] ecl. superioritât di Pieri su chei altris apuestui e dal pape di Rome, calcolât so erêt, su chei altris vescui:  [il pape] al è presonîr de sô ossession dal primât, che i impedìs di metisi in strade cun ducj i oms viers la veretât assolude che e je plui in là di ducj (Antoni Beline, Liberâ il pape)
2. s.m. il miôr risultât otignût intune specialitât sportive:  miorâ il primât european dai cent metris
   Sin. record
   
   1. risultât massim in cualsisei ativitât, no dome tal sport, ancje otignût dome par promozion o dimostrazion:  il primât dal frico plui grant, chel di 61 metris e 40 centimetris che tal Otubar dal 2016 al cuvierzè cui siei 480 chilos dut il puint dal Diaul di Cividât (Serena Fogolini, Il frico ae concuiste de Americhe)