plastic /plà-/ plas|tic [CO]
- adi. di materiâl, che al pues jessi lavorât e che al manten la forme che si dai: la cere e je un materiâl plastic
- adi. (fig.) che al à capacitât di cambiâ daûr di ce che al covente, di adatâsi: un imprest plastic. Il cerviel dal om - daûr di ce che a disin i esperts - al à une grande plasticitât e nol à dificoltât a reagjî e a coordenâsi jenfri diviers stimui (Sonia Sicco, Il bilinguisim al è un vantaç)
- adi. di tecniche o opare di art, che e prodûs une figure in trê dimensions: tai prins agns Sessante si dediche in maniere specifiche ae sculture, ancje se la sô creativitât si unìs spes fra la creazion plastiche e la pitoriche (Bepi Agostinis, Storie de art in Friûl)
- adi. di cuarp, part dal cuarp, mût di stâ o di movisi, che al à une biele forme: nol è plastic ne statuari (Toni Broili, I trucs furlans. Ombre di lunari par l'an 1851)
- adi. (fig.) ancje di alc che al è bidimensionâl o adimensionâl, che al da la impression di vê consistence materiâl, vivôr corpori: il mût di piturâ al jere corpôs, plastic (Carlo Sgorlon, Ombris tal infinît); Toni al jere propit une figure uniche: une figure vive, ancje pal so movisi a scats, pal fevelâ «plastic» e saurît (Lelo Cjanton, Il Friûl di Toni)
- adi., s.m. arm. esplosîf fat di une paste semisolide, insensibil ai colps, ae umiditât e ae temperadure, che si fâs sclopâ cuntun detonadôr: [i doi etarras] a van indevant ancjemò, tra bosc e prât, il plastic al pese te schene (Spirt Anonim, Iñaki e Aitor); par sfuarçâle [la puarte] al coventave doprâ l'esplosîf plastic (Sergio Cecotti, Il President)
- s.m. rapresentazion tridimensionâl in scjale di un ambient, di un edifici e v.i.: il plastic dulà che al coreve il trenut eletric de Lima (Checo Tam, Sense)