patriarcje
/-àr-/
pa|tri|ar|cje
[AF]
-
s.m.
persone plui anziane o plui autorevule di une grande famee, di un grup o di une tribù:
"Sâr pari, mi daiso une fete di polente?" e il vieli patriarcje al cjoleve un bâr di polente sul taulîr e le consegnave al fi (Dino Virgili, La aghe da pît la cleve);
un om, Meni, ruspi tai voi e tai conseis, un om acuart e simpri atent, tal ordenâ, come un patriarcje (Maria Forte, La tiere di Lansing)
-
s.m.
[TS]
religj.
tal Antîc Testament, progjenitôr dal popul ebraic:
Jacop, patriarcje, pari dai patriarcjis, al va a parâsi a Padan-Aram a seguit de persecuzion di so fradi Esaù (Antoni Beline, Sant Jacum, là che al finìs il mont)
-
s.m.
[TS]
ecl.
tal Orient cristian, dignitari eclesiastic cuntune posizion di supremazie in glesiis locâls impuartantis e cun facoltâts e prerogativis:
al resistè l'Imperi a Orient e i Patriarcjis di Costantinopoli e chei altris di Antiochie, di Jerusalem e di Alessandrie lu sostignirin, savint che ju varès protezûts fin che al fos durât (Adrian Cescje, Viaç aes origjins dal Logos)
-
te glesie latine, titul onorific di cualchi arcivescul:
"Viodial chê glesie là jù, Titute?… Tal mês di Lui, a la fieste dal Redentôr, a buinore, une prucission cul Patriarcje [di Vignesie] e el Cjapitul e ven fûr di Sant Marc, e traviarse la place, […] e ti rive là de glesie, pes grandis funzions de matine (Arturo Feruglio, Viaç a Vignesie)
-
(par anton.)
vescul di Aquilee, sedi tant che autoritât religjose che tant che autoritât politiche da cjâf dal Patriarcjât di Aquilee:
juste in chest timp [tai secui VI e VII] i vescui di Aquilee a scomençarin a clamâsi «patriarcjis» come in Orient (Josef Marchet, Cuintristorie dal Friûl fin sot la Italie);
cul fat che il patriarcje Siart tal 1077 nol jere plui dome vescul ma ancje cont, e scomence la storie dal stât indipendent furlan (Francesc Placerean, La nestre storie)