mascare
/mà-/
mas|ca|re
[AF]
-
s.f.
sorte di indument che e cuvierç la muse o part de muse, cun busis pai voi e in câs ancje pal nâs e pe bocje, ancje cun decorazions, doprade in cerimoniis rituâls o intai spetacui, fiestis, e v.i.:
ce gust vistîsi di arlechin e cumò biade la ore si veve metût sù i bregons e la cjamese di mil colôrs […] e po ve che e ven fûr dal sac la mascare mieze blancje mieze nere (Spirt Anonim, Eracsam);
bocjatis o difiets anatomics che a fasin ridi o stomi a son propis des mascaris pituradis di Cuie e Biliris (Erika Adami, Mascaris che a contin il Carnevâl in Friûl)
Sin. moretine ipon.
, voltin ipon.
, tomât1 ipon.
, mascarot ipon.
-
s.f.
[TS]
art, arch.
rapresentazion di une muse, ancje tant che motîf ornamentâl
-
calc de muse di un muart
-
s.f.
[TS]
teatr.
ognidun dai personaçs de comedie da la art:
la sô notorietât in France e fo grande massime par vê inventade, insiemi cun so pari, la mascare dal Pierrot come che si le cognòs in dì di vuê (Angelo Floramo, Antoni Zuan Sticotti);
il non di [Nico] Pepe al è restât leât soredut ae mascare di Pantalon (Bepi Agostinis, Storie e cronistorie dal teatri in Friûl)
-
s.f.
costum di carnevâl, soredut canonizât di une cierte tradizion, o ancje di cualsisei sorte:
bande Udin, la spaltade dal borc e jere plene di int, cualchidun vistût di mascare, cualchidun za biel che pontât (Carli Pup, Se il mont si strucje)
-
persone che e à sù un cualsisei costum di carnevâl:
lis mascaris a balin, là vie, su la strade, cu la muse matarane de ligrie e la ghigne ridicule de satire (Dino Virgili, La aghe da pît la cleve);
si spietave cul cûr in man joibe grasse, il dì di Sevrut e l'ultin dì di carnevâl par viodi lis mascaris che a vignivin jù di Urbignà, di Soremont, di Tombe, di Colosoman (Pieri Menis, Mascaris e… maraveis)
-
s.f.
(fig.)
espression o cundizion de muse che e rapresente a plen un sintiment o un mût di jessi, di stâ e v.i.:
pluitost che madurîsi tune mascare di cristian intimpât, lis cjars de muse si jerin dome frolidis e ingrispignadis come tai susins (Maria Forte, Cjase di Dalban);
i ribei cui cosacs in cercli, a començavin a viodile brute. Lis musis a jerin mascaris di pôre (Alan Brusini, Par stradis lungjis)
-
s.f.
(fig.)
aparence o innomine che e pues jessi divierse de realtât:
o varès volût cambiâle, diliberâle di chê mascare di femine lizere e bramade di tancj (Alan Brusini, Gian Paolo Linda, I forescj);
cumò che al sta par rivâ il moment decisîf, [i caporions de gnove oligarchie] a spessein a tirâ jù la mascare e mostrâ la muse (Josef Marchet, La gnespule malmadure)
-
persone false:
chest le puartave a pensâ di vê vivût simpri dongje une mascare, e di no vê mai cognossût la vere anime di lui (Maria Forte, La tiere di Lansing)
-
s.f.
cui che intun cine o intun teatri al controle i biliets e al mene i spetatôrs intal lôr puest:
cuant che jere la tô volte, la mascare ti compagnave fintremai là che e jere la poltrone libare (Vico Bressan, Cîl e aghe)
-
s.f.
sorte di indument pe muse, che al fâs di protezion o che al à funzions tecnichis specifichis:
une mascare di saldadôr
-
s.f.
zone di colôr diferent tal music di animâi, massime dumiestis
-
s.f.
[TS]
cjalç.
part centrâl e principâl de tomere, tes scarpis li che la ponte e i cuarts a son dividûts e cusîts tra di lôr
-
s.f.
[TS]
mec., tecn.
aparât par forâ e lavorâ che al vuide l'imprest a lâ just sul toc
Proverbis:
- lis mascaris si lis vent di carnevâl
- no si po puartâ simpri la mascare