letôr
le|tôr
[AF]
-
s.m.
cui che al lei:
Cuai editôrs publichino poesie par furlan? Trops sono i potenziâi letôrs di poesie furlane? Trops i potenziâi compradôrs des publicazions? (Laurin Zuan Nardin, Fra autôrs e letôrs);
il Comitât al dîs «di interpretâ il pinsîr di ducj i furlans» […] nol interprete il nestri, che al ven a jessi il pinsîr di cualchi miâr di furlans nestris abonâts, letôrs e amîs (Josef Marchet, Cuarde e savon);
i letôrs e lis letoris
-
s.m.
[TS]
lit.
cleric che al veve vût un dai ordins minôrs e che al veve la incarghe di lei i libris sacris intes funzions
-
tal seminari, cleric che al veve la incarghe di lei tescj sacris o ancje profans par intratigniment di chei altris intant che a mangjavin:
intant dal gustâ si veve di stâ cidins. Un letôr al leieve un libri edificant o di aventuris e si veve di stâ atents, ancje parcè che il prefet di une bande e l’assistent di chê atre nus tignivin di voli (Antoni Beline, La fabriche dai predis);
che se mangjin lôr chê sbobe. E po, sopuartâ propit fin l'ultin minût chel letôr cu lis solitis storiis di sants e di miracui! (Alan Brusini, Par stradis lungjis)
-
s.m.
[TS]
scol.
te universitât, docent che al ten cors pratics di une lenghe moderne tant che lenghe seconde:
Nicolò o Nikolaus Bacher (1789-1847), al vignive di une famee contadine ladine, al fo ordenât predi a Salisburc tal 1814 e te sô vite al fo ancje letôr di talian te Universitât di Innsbruck (Ilarie Colùsi, Ladinie: une identitât comun);
une letore di sloven de Universitât di Udin (Piero Cargnelutti, A Gnove Gurize si insegne la lenghe furlane)
-
s.m.
[TS]
tecn., inform.
cualsisei dispositîf doprât par lei segnâi o codiçs:
la lûs di un laser come chê dai pontadôrs o dai letôrs cd o dai codiçs a sbaris dai supermarcjâts (Marisa Michelini, Alberto Stefanel, La polarizazion de lûs)