Dizionari de Lenghe Furlane

interpretazion  /-òn/  in|ter|pre|ta|zi|on  [CO]

1. s.f. il capî e sclarî ce che al vûl dî un test, un discors e v.i.:  [Origjen] al lei la Biblie cirint di gjavâ fûr […] il significât alegoric, chel spirituâl, iluminât dal Testament Gnûf. Lis sôs interpretazions […] po dopo no saran acetadis dutis tant che ortodossis (Giovanni Battauz, Flavio Cossar, Renato Iacumin, I mosaics de basiliche di Aquilee)
   
   1. [TS] dir. individuazion dal significât just di une norme juridiche cun chê di aplicâle:  [te tutele dal furlan e je une] interpretazion limitative di dutis lis normis, vâl a dî che si fâs dome il minim di ce che la leç e oblee a fâ (e dispès nancje chel) e no si fâs invezit dut ce che la leç e permet di fâ (Sandri Carrozzo, La politiche pe lenghe furlane: risultâts de ultime aministrazion regjonâl in Friûl-VJ e propuestis pal avignî)
2. s.f. il voltâ un messaç di un ciert codiç a un lengaç plui cognossût:  la interpretazion de lineâr A no je stade ancjemò pussibile
   Sin. decifrazion
3. s.f. maniere subietive di intindi un fat, une situazion e v.i.:  il Rinassiment al rapresente un pont di riferiment fondamentâl, une vere rivoluzion pe interpretazion de realtât e pal comparî di une gnove vision dal mont (Fabian Ros, La invenzion dal stât)
   
   1. deduzion di pronostics daûr di un pinsîr magjic:  inte antichitât la interpretazion dai insiums al jere un "fenomen di masse" (Anastasia Fabbro, Franc Fari, Sui insiums di Aelius Aristides: une analisi neuropsicologjiche)
4. s.f. maniere subietive di intindi e di rapresentâ, massime cu la art, une situazion, une dinamiche e v.i.:  la situazion storiche e sociâl dal Friûl dal secont dopovuere e cjate cussì [te poesie di Otmar Mainardis] une interpretazion insumiade, fonde, intuitive (Sandri Carrozzo, Otmar Mainardis)
5. s.f. maniere di recitâ un atôr:  straordenarie la interpretazion des dôs atoris protagonistis (Fabian Ros, Il cine di Jordi Cadena)
6. s.f. maniere di eseguî un toc di musiche:  un sunadôr di orchestre […] nol pues permetisi di falâ note o la interpretazion dal diretôr (Sandri Di Suald, Comunicâ la autonomie)
7. s.f. [TS] sport inte gjinastiche e intal patinaç artistic, stîl doprât par eseguî un esercizi