integrât in|te|grât [CO]
- p.pass., adi. viôt integrâ , viôt integrâsi : cheste e je la reson de lôr insistence su la autonomie de lôr provincie [di Gurize] integrade cui teritoris di Monfalcon, Grau e Çarvignan (Josef Marchet, Friûl orientâl e autonomie regjonâl)
- adi. formât di plui parts, elements e v.i. che si cumbinin o coordenin tra di lôr, fasint ancje plui funzions: intal cjamp de comunicazion istituzionâl al pues jessi ricuardât il progjet integrât (internet, radio e tv) "Udin par Furlan", disvilupât dal Comun di Udin (Marc Stolf, Masse planc e cence plans. L'ûs public de lenghe furlane); dut chest al domande infrastruturis, politichis agriculis, ambientâls e energjetichis, intun sisteme integrât e armonic che al rivi a dâi a ogni part dal teritori la rispueste plui adeguade e rispietose (Antoni Beline, Rifondâ l'implant regjonâl)
- adi. che al è ben insedât e adatât intune comunitât: i migrants vignûts chi tai ains jenfri il '56 e la fin dai ains '80 dal secul passât a son dal dut integrâts inte societât (Anna Bogaro, Luca Melchior e i furlans di Baviere)
- adi. [TS] mat. di operazion, che si risolf in gracie di une integrazion
- adi. [TS] inform. di program, che al à dentri programs considerâts tant che un complès omogjeni, in stât di scambiâ dâts e di comunicâju tra di lôr, o ben che al è dentri di un program plui complès li che al pues scambiâ dâts e comunicâ cun altris programs: programs informatics che a puedin zovâ une vore a larc: in particolâr il Coretôr Ortografic Furlan, ancje te version integrade in Open Office, e il tradutôr automatic talian-furlan Jude3 (Sandri Carrozzo, La politiche pe lenghe furlane: risultâts de ultime aministrazion regjonâl in Friûl-VJ e propuestis pal avignî)
- adi. [TS] milit. formât di trupis di stâts diviers