incussient /-ènt/ in|cu|ssi|ent [CO]
- adi. che nol è in stât di percepî la realtât, di interpretâle, di resonâ
- adi., s.m. che, cui che nol resone e nol si compuarte in maniere responsabile, ancje tant che titul di ofese: a son umign incussients, umign che no capissin nuie de gravitât dal moment che o passìn (Josef Marchet, Barufis); un auto che al coreve injù a sbreghebalon dibot le pocà "Incussient! …" (Jolanda Mazzon, Cungjò Friûl)
- adi. [CO, TS] psic. di desideri, pulsion e v.i., che al è a un nivel de psiche no dominât de cussience: cussì, intal lobi temporâl a àn podût ingrumâsi une vore di memoriis, cussientis e incussientis (Franc Fari, Il cjâf dai furlans); come ubidint a un comant incussient e jevà sù la mieze sfere par cjalâ disot (Pierluigi Visintin, La margarite zale)
- s.m. [CO, TS] psic. nivel de psiche no dominât de cussience: tal so incussient al incovà une sorte di straneament (Maurizio Piccin, Il cercli)