incjantâsi in|cjan|tâ|si [CO]
- v.pron.intr. jessi cjapât de maravee, ancje tant di restâ imobil, o di passion, di inamorament: cuant che al lave par canoniche a judâ, si incjantave parsore un libri plen di fueis, rosis e lidrîs dissegnadis dal naturâl. Il plevan che si jere inacuart di chê passion, jal veve lassât puartâ a cjase (Maria Forte, Il Bide di Miot)
- v.pron.intr. di cdn. o di un animâl, fermâsi dut tun moment: [la musse] cuant che trote o che galope / no si incjante, no si intope (Pieri Çorut, La musse di Clarute); [un avon] al mi zire tor ator / par denant e par daûr, / po si acuarç di cualchi flôr / piturât ca e là sul mûr / e i va dongje; si inrabie, / al si incjante, al reste inciart; / po, planc planc, pe scrivanie / al mi ven sul libri viart (Emilio Nardini, Visite e invît)
- v.pron.intr. di alc, soredut di un mecanisim, fermâsi o tornâ a ripeti simpri chel stes moviment: l'orloi al si dismôf e si distint prime une suste, la suste dal cucuc, e po si sint a discjariâsi di galop ciertis aruedis inruzinidis, che corin corin sence fermâsi plui! Si sint un berli spiritât: Cu-u-u-u-u-u-u-uc! E po lis ruedis si incjantin dal moment (Giovanni Gortani, La teme - Une gnot intun cjastiel)
