implicit /-plì-/ im|pli|cit [CO]
- adi. che al è e che si capìs cence jessi pandût a clâr: la plui part di chestis iniziativis a judin a fâ cressi, in maniere implicite e esplicite, il status des lenghis des minorancis (Marc Stolf, Minorancis linguistichis); o vevi vude une sorte di deleghe implicite a tratâ jo chest aspiet de politiche autonomiste (Adrian Cescje, Memoriis di politiche linguistiche)
- adi. [TS] ling. te sintassi, di proposizion, in gjenar subordenade, che e sta sù suntun verp che nol è intun mût finît: lis concessivis implicitis si formin cul gjerundi o cul infinît introdusût di a: "purpûr volint, nol podeve fâ nuie", "ancje a lavorâ dute la gnot, no rivarai a finî par doman" (Sandri Carrozzo, Repertori di regulis pal nivel C)
- adi. [TS] mat. di funzion, che no je assegnade in maniere direte, che e risulte des relazions jenfri lis variabilis e la funzion stesse