Dizionari de Lenghe Furlane

gramule  /-à-/  gra|mu|le  [AF]

1. s.f. [TS] tecn. imprest fat di tocs di len articolâts tra di lôr, par strenzi e rompi i fuscj di cjanaipe o di lin, in mût di podê gjavâ lis fibris:  [lis plantis maciladis di cjanaipe] si slargjin a suiâ sul prât. Alore cul frac si frachin e cu la gramule si degramolein (Anonim, Lezion di pre Pieri su la cjanaipe)
   
   1. imprest mecanic par lavorâ miôr la paste dal pan o altris pastis dopo che a son stadis impastadis:  [il fornâr] al scomenzave a fâ la paste. Si lavorave dut a man in chê volte. Ancje la gramule tocjave doprâle a man (Gjovanin Falescjin, Bastian dal for)
   2. part di un imprest che al strenç:  jo, cui gnôs [dincj] i fruci coculis, i schissi nolis, i crugni sepons di pierçul... comi gramulis di na smuarsa! (Aldo Tomè, A son dincj e dincj)
2. s.f. ancje tal pl., ognidun dai doi arcs di vues, in particolâr chel disot, che a formin la bocje, li che a son insedâts i dincj, ancje in riferiment ae part di muse in corispondence di chel:  ur sfracassi lis gramulis a chei cuatri scaghets là (Dino Virgili, La aghe da pît la cleve)
   Sin. massele
   Cfr. ganasse
   
   1. part basse de muse, in corispondence cul arc di vues disot che al forme la bocje:  la gramule i tremave e lis peraulis a jessivin di bocje a stent e cun vôs che a penis si sintivile (Roberto Ongaro, Cretevierte); alt, ben plantât su lis gjambis, lis gramulis infûr, cu la piel induride dal aiar e dal soreli, i voi grîs come la fumate (Pieri Somede dai Marcs, Nadâl)
3. s.f. (fig.) capacitât o disposizion a mangjâ tant:  a jerin za pronts pes gramulis dai aventôrs un zei di trute, un cos di pan, une mont di ûfs dûrs e tant lidric di passi une pline di bûs (Pieri Menis, Disore e disot)
   
   1. persone che e mangje tant
   2. persone o struture che e dopre un ben, che e cjape bêçs, soredut se no son meretâts, che e robe e v.i.:  chescj patriarcjis a menavin daûrsi un grum di gramulis dai lôr paîs e ur metevin in man incarichis e uficis tant di glesie che di guvier (Josef Marchet, Cuintristorie dal Friûl fin sot la Italie)

Polirematichis e espressions idiomatichis

• a cuatri gramulis loc.av.
• menâ la gramule loc.v.
• menâ lis gramulis loc.v.
• meti sot des gramulis loc.v.
• meti sot la gramule loc.v.

Proverbis:

• se no tu menis i comedons, a cjase no menin lis gramulis