gobe /gò-/ go|be [AF]
- s.f. deformazion de schene, o plui da râr dal pet, cuntune fuarte prominence: la puare frutate, sentade su la cjadree, cui pîts poiâts suntun scagnut, la muse imberlade, dute plete par vie de gobe, e jere deventade tal borc un cuadri familiâr di maluserie infinide (Pieri Menis, Cui si jerial impaçât cun Modestute?)
- s.f. struture de schene des bestiis, che e pues vê diviersis carateristichis e funzions: lis gobis dal camêl
- s.f. forme plui o mancul tarondade che e da infûr di une superficie: Guri al cjale il mûr vieri de cjase domenicâl, sul cuel: clap rût, virgjin, cun pocje malte, a gobis (Dino Virgili, La aghe da pît la cleve); sot dal cei che, stant sul punt da la Miduna al è come un vêl lisimât, che al si distira di un spiç in chel âtri, alt su li gobi tarondi dai cuei, i mi fermi a dislidi drenti di mê la paussa (Novella Cantarutti, Cuant che la cjera a samea mê mari)
- s.f. (scherç., fig.) la schene, ancje cence deformazions, soredut in espressions che a vuelin dî la capacitât o l'oblic di puartâ o sopuartâ: al implenave, cu la sô pazience la cosse, po biel planc se tirave su la gobe, e vie, pleât in doi, cui braçs in crôs sul stomi (Pieri Menis, Il fi de Rosse); cul pretest che i scomençavin a pesâ i carnevâi su la gobe, a pôc a pôc si jere metût a distirâ la sflacje (Luigi Gortani, Un paîs misteriôs); e à su la gobe ancje doi fruts piçui di tirâ sù (Ivano Urli, Storie di Vera)