furmie
/-ì-/
fur|mi|e
[AF]
-
s.f.
inset di plui speciis de famee dai Formicidis, pal solit di colôr neri, brun o ros, che al vîf in societâts organizadis:
si jere stranade un pocje di farine sul orli dal rivâl e za une file nere di furmiis che a levin e vignivin le cjapavin sù par puartâle tal lôr furmiâr (Pieri Somede dai Marcs, Caritât);
al veve la manie dai gjornâi, dai canarins, dai melopsittaci e di altris animâi. E jù cun "mangime" e scjaipulis e 3x2 de Coop, cul zucar intacât des furmiis e un esercit di butiliis di detersîf miezis plenis e miezis vueidis (Checo Tam, Sic transit gloria mundi)
-
s.f.
(fig.)
in paragons o metaforis par segnâ cui che al lavore e al sparagne:
jê e cognosseve la sô nature di furmie e di âf, nassude par lavorâ, produsi, creâ, e tornâ a scomençâ dopo ogni batoste e ogni disgracie (Carlo Sgorlon, Ombris tal infinît);
un paisut involuçât tun cjalt sial di lavôr, di faturis, un mont di furmiis sparagninis che a tignivin in pîts i fogolârs (Roberto Ongaro, Cretevierte)
-
s.f.
(fig.)
ancje tal pl., sensazion di piçulis becadis o di ghiti o di pulsazions tune part dal cuarp:
no savevi ce che al sucedeve, o sintivi lis furmiis tal cjâf (Raffaele Serafini, Altris contis di famee)
-
sensazion psicologjiche di brame gnervose:
tal sanc a Mirco i corevin lis voiis che al veve simpri scugnût platâ, mil furmiis che lu cuziavin (Alan Brusini, Par stradis lungjis)
Polirematichis e espressions idiomatichis
Proverbis:
- la buine femine e à di vê: braç di açâl, panze di furmie e lenghe scjampe vie
- la femine e à di vê braçs di açâl, panze di furmie e lenghe scjampe vie
- lasse che e cjanti la ciale, tu fâs come la furmie
- no je vencjarie cence furmiis, no je veglece cence duliis
- nol è un çoc cence furmiis, nol è un vieli cence duliis